काठमाडौं, २९ असार ।
नेपाली कांग्रेसले निकै तामझामका साथ नयाँ वर्षको पहिलो दिन (१ वैशाख) बाट सुरु गरेको संगठन सुदृढीकरण सम्बन्धी ‘जरा अभियान’ आगामी ६ साउनमा समापन गर्ने भएको छ। आन्तरिक विवाद र समय व्यवस्थापनको सकसबीच गुज्रिएको यो अभियानलाई कांग्रेसले आफ्ना संस्थापक नेता बीपी कोइरालाको ४४ औं स्मृति दिवसको अवसर पारेर औपचारिक रूपमा अन्त्य गर्न लागेको हो। पार्टी महामन्त्री प्रदीप पौडेलद्वारा जारी परिपत्र अनुसार साउन ६ गते देशैभरका ७७ वटै जिल्ला कार्यसमितिहरूको आयोजनामा व्यापक सहभागितासहित यस अभियानको समापन गरिनेछ।
पार्टीभित्रै कार्यविधि र प्रक्रियालाई लिएर सुरुवातमै विवाद चुलिएको यस अभियानले तल्लो तहमा क्रियाशील सदस्यता वितरण र नवीकरणलाई मुख्य एजेन्डा बनाएको थियो। अर्का महामन्त्री गगन थापाले वैशाख १ गते आफैं वडा कार्यालयमा उपस्थित भई सदस्यता अद्यावधिक गरेर सुरु गरेको यस अभियानमा सबै क्रियाशील सदस्यले भौतिक रूपमा उपस्थित हुनुपर्ने बाध्यकारी नियम ल्याइएपछि पार्टीभित्र असन्तुष्टि चुलिएको थियो। सोही खिचातानी र प्राविधिक कठिनाइका कारण पहिले २० असारसम्म तोकिएको नयाँ सदस्यता वितरणको समयसीमालाई केन्द्रीय प्रतिनिधिहरूको आग्रहमा आगामी ३ साउनसम्मका लागि थप गरिएको छ।
परिपत्रमा उल्लेख भए बमोजिम साउन ३ गतेभित्र क्रियाशील सदस्यता वितरण लगायतका सम्पूर्ण सांगठनिक कार्यहरू भुइँतहमा सम्पन्न गरिसक्नु पर्नेछ। त्यसलगत्तै देशभरका पालिकाहरूमा खटिएका प्रतिनिधिहरूले आफूले तयार पारेको कार्यप्रगति प्रतिवेदन ४ साउनभित्र जिल्लामा खटिएका केन्द्रीय प्रतिनिधिहरूलाई बुझाउनु पर्ने समयसीमा तोकिएको छ। यो अभियानको पूर्ण प्रतिवेदन र समीक्षाले आगामी दिनमा कांग्रेसको आन्तरिक शक्ति सन्तुलन र संगठनको वास्तविक धरातल कस्तो छ भन्ने कुराको फैसला गर्ने देखिन्छ।
