मकवानपुर। जेनजी आन्दोलनले अवरुद्ध गरेको यु–१४ विद्यालयस्तरीय फुटबल प्रतियोगिता पुनः सुरु, गुरूशिष्य सेमिफाइनलमा।
जेनजी आन्दोलनका कारण स्थगित गरिएको मकवानपुरको यु–१४ विद्यालयस्तरीय फुटबल प्रतियोगिता आज (मंगलबार)देखि पुनः सुरु भएको छ। प्रतियोगिता भोलि (बुधबार)सम्म चल्नेछ। विसं २०८१ असोज १२ गते पहिरोमा परी मृत्यु भएका स्व. अनुपम घलान, साईमन योन्जन, दिवस बानियाँ, विकल रेग्मी, आदित्य बलम्पाकी र प्रियान्स आचार्यको स्मृतिमा गत भदौ १९ गतेदेखि प्रतियोगिता सुरु भएको हो।
भदौ २३ र २४ गतेको जेनजी आन्दोलनका कारण खेल स्थगित भएको थियो। यसअघि ११ खेल सम्पन्न भइसकेका छन् भने बाँकी ९ खेल भइरहेको आयोजकले जनाएको छ।
आज सम्पन्न खेलमा गुरूशिष्य पाठशाला हेटौंडा–१९ ले देवकी माध्यमिक विद्यालय बागमतीलाई ३–० ले पराजित गर्दै सेमिफाइनलमा प्रवेश गरेको छ। गुरूशिष्यका रोहित कुमालले दुई तथा सिदान्त लोले एक गोल गर्दै टोलीलाई जित दिलाए। भोलि बिहान ७ बजे गुरूशिष्य पाठशाला र सोलिडारिटीबीच सेमिफाइनल प्रवेशका लागि पहिलो भिडन्त हुने गुरूशिष्य पाठशालाका अध्यक्ष दिनेश चौलागाईंले जानकारी दिए।
प्रतियोगिताको विजेता टोलीले २५ हजार रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले १५ हजार रुपैयाँ पाउनेछ। विजेता टोलीले मकवानपुर जिल्लाको प्रतिनिधित्व गर्दै पुस २५ गतेदेखि नुवाकोटमा हुने प्रदेशस्तरीय प्रतियोगितामा सहभागी हुने महासचिव सुवेदीले बताए।



















