हेटौंडा, २९ असार ।
रोजगारीको खोजीमा दैनिक हजारौँ युवाहरू मरुभूमिको तातो रापमा पसिना बगाउन विदेशिरहेका बेला हेटौंडाका एक युवाले भने स्वदेशमै पसिना बगाएर उदाहरणीय काम गरेका छन्। हेटौंडा–८, कमानेका सुजन कार्कीले आफ्नै ठाउँमा ‘बिन्दावासिनी मिट सप’ सञ्चालनमा ल्याएर आर्थिक आत्मनिर्भरताको बाटो रोजेका हुन्। युवाहरूका लागि विदेश मात्र विकल्प होइन भन्ने बलियो उदाहरण प्रस्तुत गर्दै सुजनले सुरु गरेको यो व्यवसाय यतिबेला स्थानीय क्षेत्रमा श्रम र उद्यमशीलताको एउटा प्रेरणादायी सन्देश बनेको छ।
स्थानीय उपभोक्ताको स्वास्थ्य र मागलाई ध्यानमा राख्दै यो मिट सपले ताजा तथा पोषिलो अण्डा र गुणस्तरीय कुखुराको मासु बजार भाउभन्दा उचित मूल्यमा उपलब्ध गराउँदै आएको छ। घरायसी प्रयोजनका लागि खुद्रा खरिद गर्ने ग्राहकदेखि विवाह, व्रतबन्ध, भोजभतेर तथा विभिन्न पार्टी जस्ता ठूला समारोहका लागिसमेत यहाँबाट थोक मूल्यमा मासु र अण्डाको अर्डर लिने र आपूर्ति गर्ने विशेष व्यवस्था मिलाइएको छ। उपभोक्ताको विश्वास जित्नु नै व्यवसायको सफलता रहेको बताउँदै सञ्चालक कार्कीले स्थानीय उत्पादन र उच्च गुणस्तरलाई पहिलो प्राथमिकता दिएको बताएका छन्।
सञ्चालक कार्कीका अनुसार साना–ठूला जस्तासुकै व्यवसाय भए पनि आफ्नै देश र माटोमा सङ्घर्ष गर्दा सम्मानजनक आम्दानी र आत्मसन्तुष्टि दुवै मिल्छ। स्थानीय उपभोक्तालाई एकपटक आफ्नो पसलको गुणस्तरीय सेवा लिएर स्वदेशी उद्यमलाई प्रोत्साहन गर्न उनले आग्रहसमेत गरेका छन्। स्वदेशी उत्पादन र उपभोक्ताको स्वास्थ्यलाई जोड्ने सुजनको यो प्रयासले हेटौंडामा श्रमको सम्मान गर्ने नयाँ संस्कृति बसाल्न मद्दत पुग्ने अपेक्षा गरिएको छ।
