हेटौँडा । हेटौँडा उपमहानगरपालिका वडा नम्बर ८ को आयोजनामा सञ्चालित सप्ताहव्यापी खेलकुद कार्यक्रमअन्तर्गत चौथो वडाध्यक्ष कप फुटबल प्रतियोगिताको उपाधि कालिका टोल विकास संस्थाले जितेको छ। रोमाञ्चक फाइनल खेलमा मनकामना ‘ख’ टोल विकास संस्थालाई ३-० गोल अन्तरले पराजित गर्दै कालिकाले उपाधिमाथि कब्जा जमाएको हो। सप्ताहव्यापी विविध खेलकुद प्रतियोगिताअन्तर्गत सञ्चालित तेस्रो कमाने रन (खुल्ला दौड) को पुरुषतर्फ ५ किलोमिटरको दुरी १९.१८ मिनेटमा पूरा गर्दै बादल घलान प्रथम हुनुभएको छ। त्यसैगरी १९.३३ मिनेटमा दौड पूरा गरी जोएल गुरुङ दोस्रो र २०.२० मिनेटमा दुरी पार गर्दै सुरज तामाङ तेस्रो स्थान हासिल गर्न सफल हुनुभयो।
त्यस्तै कमाने रनअन्तर्गत महिलातर्फको ३ किलोमिटर दुरी ७.४२ मिनेटमा पूरा गर्दै सिर्जना स्याङ्तान प्रथम हुनुभएको छ। प्रतिस्पर्धामा ७.५० मिनेटमा दौड पूरा गरेकी अनिषा थोकर दोस्रो र ८.१८ मिनेटमा दुरी पार गर्दै रियाना थिङ तेस्रो हुनुभएको छ। महिलाहरू लक्षित गरी आयोजना गरिएको स्लो स्कुटी रेस प्रतियोगितामा अमृता गुरुङ प्रथम स्थान हासिल गर्नुभएको छ। सोही प्रतियोगितामा सिर्जना भट्टराई दोस्रो र सोबिता अधिकारी तेस्रो स्थान हासिल गर्न सफल हुनुभयो।
यसैगरी निकै शक्ति र उत्साहका साथ खेलिएको डोरी तान्ने खेलमा किरणचोक फारलाइन टोल विकास संस्था प्रथम भएको छ। फाइनल भिडन्तमा मनकामना ‘ख’ टोललाई पराजित गर्दै फारलाइनले डोरी तान्ने खेलको उपाधि आफ्नो नाममा पारेको हो।



















