हेटौंडा–११ थानाभर्याङस्थित बालसुधार गृहमा किशोरहरूको मानसिक स्वास्थ्य सुदृढ बनाउँदै उनीहरूलाई सकारात्मक जीवन दृष्टिकोणतर्फ डोर्याउने उद्देश्यले एक विशेष परामर्श कार्यक्रम आयोजना गरिएको छ। अनपेक्षित परिस्थितिका कारण सुधार गृहसम्म पुगेका ७२ जना बालकहरूलाई आफ्नो मानसिक स्थिति बलियो बनाउन र तनाव व्यवस्थापन गर्न सघाउने हेतुले ‘मनोसामाजिक सचेतना तथा आत्महेरचाह’ सम्बन्धी प्रशिक्षण दिइएको हो।
इन्सेक, मानव अधिकार रक्षक सञ्जाल बागमती प्रदेश र सुनौलो शिक्षा नेपालको संयुक्त पहलमा सञ्चालित उक्त कार्यक्रमले किशोरहरूमा आत्मविश्वास अभिवृद्धि गर्ने प्रयास गरेको छ। तालिमका क्रममा मनोसामाजिक परामर्शकर्ता तथा सुनौलो शिक्षा नेपालका अध्यक्ष आशिष दुलालले दैनिक जीवनमा आइपर्ने मानसिक तनावलाई कसरी व्यवस्थापन गर्ने, नकारात्मक सोचबाट कसरी बच्ने र आत्महेरचाह (Self-care) का विधिहरू के-के हुन् भन्नेबारे व्यवहारिक ज्ञान हस्तान्तरण गर्नुभयो।
बालसुधार गृहलाई केवल नियन्त्रण वा सजाय काट्ने थलोको रूपमा मात्र नभई पुनर्स्थापना केन्द्रको रूपमा विकास गर्न यस्ता अभ्यासहरू कोसेढुङ्गा साबित हुने देखिन्छ। अनुशासनको दायराभित्र रहँदा भावनात्मक परिपक्वता र सकारात्मक सोचको विकास हुनु अत्यावश्यक रहेकाले, प्रशिक्षणले सहभागी बालकहरूमा भविष्यप्रतिको आशावादी दृष्टिकोण जगाउन र मानसिक रूपमा सबल बनाउन प्रत्यक्ष सहयोग पुर्याएको छ।
बालसुधार गृहका प्रमुख प्रदीप गौतमले पनि किशोर अवस्थामा हुने मानसिक तथा भावनात्मक उतारचढावलाई सम्बोधन गर्न यस्ता परामर्शको भूमिका महत्त्वपूर्ण रहने बताउनुभयो। उहाँका अनुसार सुधार गृहका बालकहरूलाई समाजमा पुनःस्थापित गराउन उनीहरूको मनोबल उच्च बनाउनु प्राथमिक शर्त हो। सुधार गृह प्रशासनले बालकहरूको बृहत्तर हित र उनीहरूभित्र लुकेको सम्भावनालाई उजागर गर्न यस्ता रचनात्मक तथा सचेतनामूलक कार्यक्रमहरूलाई आगामी दिनमा पनि निरन्तरता दिइने प्रतिबद्धता व्यक्त गरेको छ।
