पशुपतिनगर हेल्थ क्लबद्वारा विजया दशमी तथा दीपावलीको अवसरमा शुभकामना आदान-प्रदान कार्यक्रम सम्पन्न

हेटौँडा, मकवानपुर ।
“नियमित व्यायाम गरौँ, स्वस्थ रहौँ” भन्ने मूल नाराका साथ स्थापित पशुपतिनगर हेल्थ क्लब, हेटौँडा-९ को आयोजनामा विजया दशमी, शुभ दीपावली, नेपाल संवत् तथा छठ पर्वको पावन अवसरमा शुभकामना आदान-प्रदान तथा चियापान कार्यक्रम भव्य रूपमा सम्पन्न भएको छ। क्लबका कार्यवाहक अध्यक्ष प्रेम प्रसाद बोलखेको सभाध्यक्षतामा आयोजित उक्त कार्यक्रममा क्लबका सदस्यहरू तथा स्थानीय महानुभावहरूको बाक्लो उपस्थिति रहेको थियो।

​कार्यक्रमका प्रमुख अतिथि हेटौँडा उपमहानगरपालिका वडा नं. ९ का वडा अध्यक्ष सुकुराम केसी रहनुभएको थियो। कार्यक्रमलाई सम्बोधन गर्दै प्रमुख अतिथि केसीले स्वास्थ्य नै जीवनको सबैभन्दा ठूलो धन भएको बताउँदै पशुपतिनगर हेल्थ क्लबले स्थानीय तहमा शारीरिक सुगठन, स्वस्थ जीवनशैली र सामाजिक सद्भाव कायम राख्न खेलेको भूमिकाको उच्च प्रशंसा गर्नुभयो। उहाँले नेपालीहरूको महान् चाडपर्वहरूले समाजमा एकता र आपसी भाइचारा बढाउन मद्दत पुर्‍याउने विश्वास व्यक्त गर्दै सम्पूर्ण वडावासी तथा क्लब परिवारलाई शुभकामना व्यक्त गर्नुभयो।

​सभाध्यक्ष प्रेम प्रसाद बोलखेले कार्यक्रममा उपस्थित सम्पूर्ण अतिथि तथा सहभागीहरूलाई धन्यवाद ज्ञापन गर्दै क्लबले आगामी दिनहरूमा पनि नियमित स्वास्थ्यसम्बन्धी गतिविधिहरूसँगै सामाजिक कार्यहरूलाई निरन्तरता दिने प्रतिबद्धता व्यक्त गर्नुभयो। कार्यक्रममा स्वागत मन्तव्य क्लबका उपाध्यक्ष सुनिल लोप्चानले गर्नुभएको थियो। २०७५ सालमा स्थापित यस क्लबले नियमित व्यायामको प्रवर्द्धन गर्नुका साथै बोलबम कलश यात्रा जस्ता धार्मिक एवं सामाजिक कार्यक्रमहरू समेत आयोजना गर्दै आइरहेको छ। शुभकामना आदान-प्रदान पश्चात् आयोजित चियापान कार्यक्रमसँगै समारोह समापन भएको थियो।

प्रतिकृया दिनुहोस्

सम्बन्धित समाचारहरु

No widgets found. Go to Widget page and add the widget in Offcanvas Sidebar Widget Area.