हेटौंडा / संविधान दिवसको राष्ट्रिय उत्सवलाई खेलकुदको माध्यमबाट मनाउँदै हेटौंडामा जुनियर खेलाडीहरूको प्रतिभा पहिचान र विकासका लागि नयाँ पहलमञ्च तयार पारिएको छ। हेटौंडा उपमहानगरपालिका–४ नम्बर वडा कार्यालयको आयोजनामा दोस्रो नगरस्तरीय जुनियर आमन्त्रण तेक्वान्दो प्रतियोगिता शनिबारदेखि रोयल पार्टी प्यालेसमा भव्य रूपमा सुरु भएको हो। मकवानपुर तेक्वान्दो डोजाङ, हेटौंडा–४ को व्यवस्थापन तथा मकवानपुर जिल्ला तेक्वान्दो संघको प्राविधिक सहयोगमा सञ्चालित यस प्रतियोगिताले स्थानीय स्तरमा रहेका उदीयमान खेलाडीहरूलाई आफ्नो क्षमता प्रदर्शन गर्ने उत्कृष्ट अवसर प्रदान गरेको छ।
प्रतियोगितामा जिल्लाभित्रका १४ वटा तेक्वान्दो डोजाङहरूबाट करिब १६० जना जुनियर खेलाडीहरूले सहभागिता जनाएका छन्। सानै उमेरदेखि खेलकुदप्रति रुचि जगाउने, खेलाडीहरूलाई प्रोत्साहन गर्ने र राष्ट्रिय स्तरका खेलाडी उत्पादन गर्ने उद्देश्यका साथ आयोजना गरिएको यस प्रतियोगितामा खेलाडीहरूबीच रोचक र प्रतिस्पर्धात्मक खेलहरू भइरहेका छन्। उत्कृष्ट प्रदर्शन गर्ने खेलाडी तथा टोलीलाई आकर्षक ट्रफी, प्रमाणपत्रका साथै नगद पुरस्कारको समेत व्यवस्था गरिएको छ, जसले साना खेलाडीहरूमा थप उत्साह भरेको छ।
कार्यक्रमको उद्घाटन समारोहलाई सम्बोधन गर्दै बागमती प्रदेशका मुख्यमन्त्री किरण थापा मगरले खेलकुद क्षेत्रको दिगो विकासका लागि तीनै तहका सरकारको सहकार्य आवश्यक रहेको बताउनुभयो। प्रदेश सरकारले बागमती प्रदेशका १३ वटै जिल्ला र ११९ स्थानीय तहमा सम्भावनाका आधारमा खेलकुद पूर्वाधार र प्रतियोगिताहरूका लागि बजेट विनियोजन गरिरहेको जानकारी दिँदै मुख्यमन्त्री थापा मगरले सङ्घीयता कार्यान्वयनपछि स्थानीय तहहरू आफैं खेलकुद विकासमा सक्रिय हुनु सकारात्मक कदम रहेको उल्लेख गर्नुभयो।
मकवानपुर तेक्वान्दो डोजाङ हेटौंडा–४ का संयोजक निरु थापा मगरको सभाध्यक्षतामा सम्पन्न उक्त उद्घाटन कार्यक्रमले स्थानीय स्तरमा डोजाङ स्थापना र खेलकुद पूर्वाधार निर्माणमा सरकारको लगानीलाई अझ सशक्त बनाउनुपर्ने सन्देश दिएको छ। वडा तहबाटै खेलकुदका गतिविधिहरूलाई निरन्तरता दिँदा तल्लो स्तरका प्रतिभाहरू ओझेलमा नपर्ने र उनीहरूले राज्यको ध्यान आकर्षित गर्न सक्ने विश्वास कार्यक्रमका सहभागीहरूले व्यक्त गरेका छन्।
वडा कार्यालयले तेक्वान्दोसँगै अन्य खेलकुदलाई पनि उत्तिकै प्राथमिकतामा राखेको छ। यसै सिलसिलामा हेटौंडा–४ नम्बर वडा कार्यालय र नगरस्तरीय क्रिकेट व्यवस्थापन समितिको संयुक्त व्यवस्थापनमा ‘नगरस्तरीय क्रिकेट प्रतियोगिता–२०८३’ को समेत तयारी भइरहेको छ। मकवानपुर क्रिकेट संघको प्राविधिक सहयोगमा हुने उक्त प्रतियोगितामा उपमहानगरपालिकाका विभिन्न वडाका टोलीहरू सहभागी हुनेछन्, जसले हेटौंडालाई समग्र खेलकुदको हबका रूपमा विकसित गर्न ठूलो योगदान पुर्याउने अपेक्षा गरिएको छ।
