मकवानपुरगढी।
नेकपा एमालेले पार्टीभित्र देखिएको निराशा चिर्दै संगठन पुनर्गठन र जनतासँगको सम्बन्ध पुनः जोड्न मकवानपुरगढीमा ‘मिसन पार्टी जागरण-२०८३’ अभियान तीव्रताका साथ अघि बढाएको छ। पछिल्लो राजनीतिक घटनाक्रम र वर्तमान सरकारप्रतिको बढ्दो जनअसंतोषलाई राजनीतिक अवसरका रूपमा लिँदै एमालेले मकवानपुरगढी गाउँपालिकाबाट आफ्नो आन्तरिक सुदृढीकरण र भावी रणनीतिको खाका सार्वजनिक गरेको छ।
कार्यक्रममा नेताहरूले विशेष गरी वर्तमान बालेन्द्र सरकारको कार्यशैली र ६ महिने कार्यकालको कडा आलोचना गरेका छन्। नेकपा एमाले केन्द्रीय लेखा आयोग सदस्य एवं मकवानपुरगढीका केन्द्रीय प्रतिनिधि नवीन सिग्देलका अनुसार बालेन्द्र सरकारप्रतिको जनमोहभङ्ग भइसकेको छ। विपत् र संकटका बेला जनताले फेरि पनि एमालेकै नेतृत्व खोजिरहेको दाबी गर्दै उनले पार्टीमाथि लगाइएका सबै भ्रमहरू चिरेर एमालेलाई पुनः देशको पहिलो र निर्णायक राजनीतिक शक्तिका रूपमा स्थापित गर्ने दाबी गरे।
राजनीतिक वक्तव्यबाजीमा मात्र सीमित नभई अबको अभियान पूर्ण रूपमा वडा, कार्यकर्ता र जनता केन्द्रित हुने पार्टीको नीति छ। एमाले प्रदेश कमिटी सदस्य रामचन्द्र राईले नेता-कार्यकर्ताको भनाइ र गराइमा एकरूपता हुनुपर्नेमा जोड दिँदै सामाजिक रूपान्तरणका लागि जनताका दैनिकी र समस्यासँग प्रत्यक्ष जोडिन निर्देशन दिए। वर्तमान सरकारका मन्त्रीहरूबाट जनताले कुनै अपेक्षा नगरेको र सरकार गैरजिम्मेवार बन्दै गएको आरोप लगाउँदै विकास र जनअपेक्षा सम्बोधनको विकल्प एमाले मात्रै भएको उनको भनाइ थियो।
यसैगरी, जिल्ला कार्यवाहक अध्यक्ष हिदम लामाले राष्ट्रिय राजनीतिमा भूराजनीतिको ठाडो हस्तक्षेप र भर्खरै भएका अराजक गतिविधिहरूप्रति चिन्ता व्यक्त गरे। जेठ २४ गतेको घटनालाई ‘नेपालको इतिहासको कालो दिन’ को रूपमा टिप्पणी गर्दै उनले जेन्जी आन्दोलनको नाममा राष्ट्रिय सम्पदा, सरकारी तथा व्यक्तिगत सम्पत्ति जलाउने काम भएको र यसले देशलाई अस्थिरतातर्फ धकेलेको बताए। राष्ट्रियता, लोकतन्त्र र संविधानको रक्षाका लागि एमालेको दह्रिलो उपस्थिति अपरिहार्य रहेको उनको तर्क थियो।
पालिका कमिटी अध्यक्ष जीतबहादुर घिमिरेको अध्यक्षतामा सम्पन्न उक्त अभिमुखीकरण कार्यक्रम केवल भाषणमा मात्र सीमित नभई व्यावहारिक कार्ययोजनामा ढालिएको छ। पालिका कमिटी सचिव रोमनाथ रेग्मीका अनुसार अभियानअन्तर्गत वडा र टोल कमिटीहरूको पुनर्गठन, पार्टी सदस्यता नवीकरण तथा विस्तार, जनसंगठनका पालिका संयन्त्र भेला र आगामी चाडपर्वका अवसरमा शुभकामना आदानप्रदान तथा चियापानजस्ता तल्लो तहसम्म प्रभाव पार्ने रचनात्मक कार्यक्रमहरू तय गरिएका छन्।
