हेटौँडा : नेपाली काँग्रेसको १५औँ महाधिवेशनअन्तर्गत मकवानपुरका सबै १०२ वटै वडामा आइतबारदेखि सुरु भएको वडा अधिवेशन केवल कार्यसमिति चयनमा मात्र सीमित नभई स्थानीय स्तरमै फराकिलो र समावेशी नेतृत्व निर्माणको अभ्यास बनेको छ। जिल्ला निर्वाचन समितिका अनुसार वडा सभापतिसहित कुल २ हजार ५ सय ९२ जना क्षेत्रीय प्रतिनिधि चयन हुने यस प्रक्रियामा युवा, महिला, अपाङ्गता भएका व्यक्ति, दलित, श्रमिक तथा पेसागत बुद्धिजीवीको दरिलो उपस्थिति सुनिश्चित गरिएको छ। वडा तहबाटै समावेशी सिद्धान्तलाई कडाइका साथ लागू गर्दै आन्तरिक लोकतन्त्रलाई सुदृढ बनाउने रणनीतिमा पार्टी देखिएको छ।
११ हजार ६१७ जना क्रियाशील सदस्य रहेको मकवानपुरमा क्रियाशील सदस्यको संख्याका आधारमा २३ जनादेखि ७५ जनासम्म क्षेत्रीय प्रतिनिधि चयन हुने विधान व्यवस्थाले पार्टीभित्र उत्साह थपेको छ। यसपटक प्रत्यक्षतर्फ १ हजार ८३० र समानुपातिकतर्फ ६६० जना प्रतिनिधि छानिनेछन्। वडा अधिवेशनबाट चयन हुने यिनै प्रतिनिधिहरूले नै आगामी असोज ७ गते हुने पालिका अधिवेशन, असोज १० गतेका प्रदेश तथा प्रतिनिधिसभा क्षेत्रीय अधिवेशन र त्यसपछिको जिल्ला अधिवेशनमा निर्णायक भूमिका खेल्ने भएकाले तल्लो तहदेखि नै शक्ति सन्तुलन मिलाउन नेता-कार्यकर्ता सक्रिय रूपमा खटिएका छन्।
पार्टीभित्र कुनै विवाद नरहेको र १५औँ महाधिवेशनलाई ‘एकताको महाधिवेशन’का रूपमा सम्पन्न गर्न जिल्ला नेतृत्व प्रतिबद्ध देखिएको छ। निर्वाचन अधिकृत अधिवक्ता राजकुमार उप्रेतीका अनुसार सबै वडामा मतदान अधिकृतलाई अभिमुखीकरण दिएर खटाइइसकेकाले निर्वाचन प्रक्रिया मर्यादित र व्यवस्थित रूपमा अघि बढेको छ। स्थानीय तहको यो जनआधारित अधिवेशनले आगामी असोज १६ देखि १९ गतेसम्म काठमाडौँमा हुने केन्द्रीय महाधिवेशनका लागि मकवानपुर कांग्रेसमा राजनीतिक माहोल पूर्ण रूपमा तताएको छ।
