हेटौंडा। रसुवाको भोटेकोसीमा आएको भीषण बाढीका कारण मुख्य सडक मार्गहरू अवरुद्ध भएपछि पूर्व–पश्चिम राजमार्ग तथा त्रिभुवन राजपथ हुँदै काठमाडौं आवतजावत गर्ने गाडी र यात्रुहरूको चाप अत्यधिक बढेको छ। घण्टौंसम्मको कष्टकर यात्रा, बाटोको सास्ती र समयको चापका कारण भोकै यात्रा गर्न बाध्य नागरिकहरूलाई लक्षित गर्दै हेटौंडामा सामाजिक संस्थाहरूले राहतको हात बढाएका छन्।
यात्राका क्रममा यात्रुहरूले भोग्नुपरेको समस्यालाई सम्बोधन गर्न सुरु गरिएको निःशुल्क खाना अभियान अब कुनै एक संस्थामा मात्र सीमित नरही बृहत् साझा सामाजिक अभियानका रूपमा अघि बढेको छ। सुरुमा नागरिक समाज मकवानपुरले हेटौंडा–१ स्थित भाटभटेनी अगाडिबाट सुरु गरेको यो मानवीय सेवामा नगरका अन्य सामाजिक संघसंस्थाहरूले पनि सक्रिय सहभागिता र हातेमालो गर्न थालेका छन्।
नागरिक समाज मकवानपुरका अनुसार यात्रुहरूलाई यात्रा अवधिभर भोकै रहन नदिने उद्देश्यले विभिन्न संस्थाहरूले पालो मिलाएर (आलोपालो) खाना खुवाउने व्यवस्था मिलाएका छन्। जसअनुसार पहिलो दिन नागरिक समाजले खाना वितरण गरेपछि भोलिपल्ट मारवाडी सेवा समाजले सेवाको जिम्मेवारी सम्हाल्ने भएको छ भने त्यसपछिका दिनहरूमा अन्य विभिन्न संस्थाहरूले क्रमशः निःशुल्क खाना खुवाउने तालिका बनाएका छन्।
हेटौंडा उपमहानगरपालिका र जिल्ला प्रशासन कार्यालय मकवानपुरको सहकार्यमा सञ्चालित यो अभियानले विपत्तिको समयमा नागरिकस्तरबाट पुऱ्याइने सहयोगको उत्कृष्ट उदाहरण पेस गरेको छ। बाटोको चाप कायम रहेसम्म र यात्रुहरूलाई समस्या भइरहँदासम्म हेटौंडाका विभिन्न संस्थाहरूको सक्रियतामा यो निःशुल्क भोजन सेवा निरन्तर सञ्चालन हुने आयोजकहरूले जनाएका छन्।
