काठमाडौं । उत्तरी रसुवाको भोटेकोशी नदीमा आएको विनाशकारी बाढीका कारण पुगेको ठूलो जनधनको क्षतिप्रति भारतीय प्रधानमन्त्री नरेन्द्र मोदीले गहिरो दुःख व्यक्त गर्नुभएको छ। प्रधानमन्त्री बालेन्द्र शाहसँग टेलिफोन संवाद गर्दै प्रधानमन्त्री मोदीले बाढीमा ज्यान गुमाउनेहरूप्रति श्रद्धाञ्जली अर्पण गर्दै प्रभावित परिवारजनमा समवेदना प्रकट गर्नुभएको हो। यो कठिन समयमा भारतीय जनता नेपाली दाजुभाइ तथा दिदीबहिनीहरूसँग पूर्ण ऐक्यबद्धताका साथ उभिएको उहाँले बताउनुभएको छ।
टेलिफोन संवादका क्रममा भारतीय प्रधानमन्त्री मोदीले नेपालका लागि सम्भावित सबै प्रकारका मानवीय सहायता उपलब्ध गराउन भारत तयार रहेको स्पष्ट पार्नुभएको छ। बाढी प्रभावित क्षेत्रमा भइरहेको खोजी, उद्धार तथा राहत कार्यमा सहयोग पुर्याउन दुवै देशका टोलीहरूबीच निकटताका साथ समन्वय भइरहेको समेत उहाँले जानकारी दिनुभएको छ।
रसुवाको टिमुरे र स्याफ्रुबेंसी क्षेत्रमा बाढीले व्यापक क्षति पुर्याएपछि नेपाली सेनाका हेलिकप्टर र ड्रोनमार्फत उद्धार कार्य तीव्र पारिएको छ। विशेषज्ञहरूले सीमापारि चीनतर्फ रहेका हिमताल विस्फोट (GLOF) वा हिमपहिरोका कारण यति ठूलो बाढी आएको अनुमान गरिरहेका बेला छिमेकी मुलुक भारतबाट उद्धार र राहतका लागि प्राप्त यो प्रतिबद्धताले विपद् व्यवस्थापनमा थप राहत पुग्ने विश्वास लिइएको छ।
