अटिजम राष्ट्रिय चुनौती:​”अटिजम भएका बालबालिकाका लागि अस्पतालसहितको सुविधायुक्त विद्यालय सञ्चालन गर्नुपर्छ: वडा अध्यक्ष सिग्देल”

विशेष रिपोर्ट / हेटौँडा
बढ्दो आधुनिकता र जीवनशैलीका कारण बालबालिकाहरूमा अटिजमको समस्या गम्भीर रूपमा देखा पर्न थालेको छ। यसै सन्दर्भमा हेटौँडा उपमहानगरपालिका वडा नं. ४ का अध्यक्ष नवीन सिग्देलले अटिजमलाई एउटा परिवारको मात्र नभई सम्पूर्ण देशकै साझा र विकराल समस्याको रूपमा लिनुपर्ने बताउनुभएको छ। सेन्टर फर अटिजम, मकवानपुरको चौथो साधारणसभालाई सम्बोधन गर्दै उहाँले अटिजम प्रभावित बालबालिकाको अधिकार र हेरचाहमा राज्यको प्रत्यक्ष उपस्थिति हुनुपर्नेमा जोड दिनुभयो।

​अटिजम भएका बालबालिकाहरूको शारीरिक र मानसिक अवस्था सर्वसाधारण बालबालिकाको भन्दा फरक हुने भएकाले उनीहरूका लागि परम्परागत शिक्षण पद्धति पर्याप्त हुँदैन। अध्यक्ष सिग्देलका अनुसार यस्ता बालबालिकाका लागि स्वास्थ्य उपचार र अध्ययन/थेरापी एकै ठाउँबाट उपलब्ध हुने गरी ‘विशेष सुविधायुक्त अस्पतालसहितको विद्यालय’ सञ्चालन गर्न अति आवश्यक भइसकेको छ। यस्ता पूर्वाधार निर्माणका लागि संघ, प्रदेश र स्थानीय गरी तिनै तहका सरकारबीच दह्रो समन्वय हुनुपर्ने उहाँको भनाइ थियो।

​अधिकांश समाजमा अटिजम भएका बालबालिकाको हेरचाहलाई केवल अभिभावक वा परिवारको व्यक्तिगत दायित्वका रूपमा मात्र हेर्ने गरिन्छ। तर, वडा अध्यक्ष सिग्देलले यो सोचमा परिवर्तन ल्याउनुपर्ने बताउनुभयो। “पारिवारिक दायित्व त छँदै छ, तर राज्यले आफ्ना नागरिकको हक हितका लागि यस्ता बालबालिकाको दायित्व लिनुपर्छ,” भन्दै उहाँले उनीहरूलाई समाजको मूल प्रवाहमा ल्याउन सरकारी तवरबाटै नीतिगत र आर्थिक सहयोगको खाँचो रहेको औंल्याउनुभयो।

​जिल्लास्तरमा अटिजम प्रभावित बालबालिकाको सहारा बन्दै आएको सेन्टर फर अटिजम, मकवानपुरले हाल करिब ४० जना बालबालिकालाई सेवा प्रदान गरिरहेको छ। सीमित स्रोत र साधनका बाबजुद संस्थाले बालबालिकाहरूको मानसिक तथा शारीरिक विकासका लागि नियमित थेरापी र परामर्श सेवा दिँदै आएको जानकारी सो अवसरमा दिइयो।

​संस्थाका अध्यक्ष हरिकृष्ण मैनालीको अध्यक्षतामा सम्पन्न साधारणसभामा संस्थाको समग्र गतिविधि र भावी योजनाबारे छलफल भएको थियो। सभामा उपाध्यक्ष शेखर थपलियाले वार्षिक प्रगति प्रतिवेदन र कोषाध्यक्ष निसला श्रेष्ठले आर्थिक प्रतिवेदन प्रस्तुत गर्नुभएको थियो, जसलाई सभाले अनुमोदन गरेको सचिव अस्मिता कालिकाले बताउनुभयो। कार्यक्रममा संस्थाका संरक्षकद्वय बोलबहादुर कार्की र रामजी थपलियालगायत अन्य सदस्यहरूको सक्रिय सहभागिता रहेको थियो।

प्रतिकृया दिनुहोस्

सम्बन्धित समाचारहरु

No widgets found. Go to Widget page and add the widget in Offcanvas Sidebar Widget Area.