हेटौँडा। हेटौँडा उपमहानगरपालिकाले आसन्न ‘पर्यटन वर्ष २०८३’ लाई सफल बनाउन परम्परागत फोहोर संकलन प्रणालीलाई विस्थापित गर्दै नागरिकस्तरबाटै व्यवहार परिवर्तनको नवीन प्रयास सुरु गरेको छ। उपमहानगरपालिका र टोल विकास संस्था नगर समन्वय समितिको संयुक्त पहलमा सुरु भएको ‘शून्य फोहोर हेटौँडा’ अभियानले सरसफाइलाई केवल सरकारी दायित्व नभई नगरबासीको दैनिक जीवनशैली र संस्कारका रूपमा स्थापित गर्ने लक्ष्य लिएको छ। शनिबार वडा नं. ९ र ११ बाट औपचारिक रूपमा थालनी गरिएको यस बृहत् अभियानमा स्थानीय बासिन्दासँगै सुरक्षा निकाय, जनप्रतिनिधि र प्रशासनिक नेतृत्वको अभूतपूर्व ऐक्यबद्धता देखिएको छ।
सरसफाइलाई औपचारिकतामा मात्र सीमित राख्ने प्रवृत्तिको अन्त्य गर्दै यस पटकको अभियानलाई पर्यावरण र दिगो पर्यटनको बलियो जगका रूपमा हेरिएको छ। कार्यक्रममा नगर प्रमुख मीना कुमारी लामा र प्रमुख जिल्ला अधिकारी बसन्त अधिकारीले हेटौँडाको पर्यटकीय पहिचान यसको स्वच्छतासँग जोडिएको उल्लेख गर्दै यसलाई एकदिने कार्यक्रममा मात्र सीमित नराख्न आग्रह गर्नुभयो। नगरका सबै ३६६ वटै टोल विकास संस्थाहरू एकैसाथ क्रियाशील हुनुले यो अभियान सिंहदरबार वा नगर कार्यपालिकाबाट मात्र नभई प्रत्यक नागरिकको घरदैलोबाटै फोहोर व्यवस्थापन र वातावरण संरक्षणप्रतिको जिम्मेवारी बोध गराउन सफल हुने विश्वास गरिएको छ।
यो अभियानले औद्योगिक सहरका रूपमा चिनिएको हेटौँडालाई स्वच्छ, हरित र आकर्षक पर्यटकीय गन्तव्यका रूपमा रूपान्तरण गर्न रणनीतिक भूमिका खेल्ने निश्चित छ। टोल विकास संस्था नगर समन्वय समितिका अध्यक्ष ध्रुव प्रसाद अधिकारीका अनुसार, स्रोतबाटै फोहोरको वर्गीकरण र वैज्ञानिक व्यवस्थापनका लागि टोल-टोलमा सचेतना फैलाइनेछ। पर्यटन वर्ष २०८३ को संघारमा सुरु भएको यो अभियान निरन्तर रूपमा अघि बढेमा हेटौँडा नेपालकै नमूना स्वच्छ सहर बन्ने मात्र नभई आगामी दिनमा आउने आन्तरिक तथा बाह्य पर्यटकका लागि समेत एउटा बलियो आकर्षणको केन्द्र बन्ने अपेक्षा गरिएको छ।
